*)fikmin : fiksimini, sebuah genre penulisan fiksi singkat berbahasa sunda.
Fikmin # Jikan Anyar #
Haté guligah nyanghareupan isukan, wegah tapi panasaran.
“Kumaha Mang, geus siap lahir bathin?” Mang Badri nanya.
“Nyaéta mang, lahir mah geus sayagi ngan bathin masih palaur, can panceg”
“Maksadna kumaha?”
Uing ngadeukeutan Mang Badri, tuluy ngaharéwos. Mang Badri seuri tuluy unggut-unggutan.
“Engké dibéré ubarna ku amang” kitu ceunah, bari nepakan tonggong.
***
Alhamdulillah akad nikah tur walimahan lancar teu aya halangan harungan. Aya kétang sautak saetik urusan kurang lalawuh jeung pahili bésék.
Peutingna nu hariwang, sieun teu nyugemakeun. Maklum ari calon jikan parawan tingting belekesentreng, ari Uing mah durian, duda ripuh anjrxxt. “Duh sieun teu mampuh.”
“Hayu atuh Kang…” Soanten halimpu dina puhu ceuli, dilieuk téh jikan tos polos sapuratina.
Bati olohok wé teu ngiceup-ngiceup, ningal pinareup nu matak sieup. Deg!.. bumi alam oyag, geutih dina awak ngadadak lancar ngagolak. Gabrug… les poèk.
Bulan madu di rumah sakit, dibaturan mesin EKG jeung jikan anyar. Duh.
akwnulis 