Akwnulis.com, Cimohay. Muka lomari bari rerencepan, lain rék nyokot raksukan. Tapi asuk ka jero, sabab ditukangna aya panto rahasia. Tarapti nutupkeun lomari ti jero, tuluy muka tulak maké kode kombinasi sapuluh angka.
Srett!!!
Panto ngésér, rohangan caang aya hareupeun. 5 sét komputer jeung layarna nu badag, router jeung aksés internét unlimitéd. “Ieu dunya Aing”, Omin ngomong sorangan.
Gék diuk, ramo lincah nyoo kibod virtual, monitor hurung mintonkeun rupa-rupa. Aya béwara anyar sadunya, video sisitipi sakuriling kampung ogé analisis médsos keur ngadodoho kalakuan jalma réa.
Ni’mat pisan…
***
Jeprét!!!!
Reup pareum, poék mongkléng buta rajin.
Omin ngaheneng, “Poho euy can masang disel jeung UPS”
Ngaheneng deui.
Jajantung mimiti ratug beuteung ngusial, sirah ngadadak lieur. Cengkat uyup ayap néang panto kaluar.
Teu kapanggih.
***
3 dinten salajengna.
“Katawisna bau bangké téh tina lomari mang” Saur Sérsan Budi bari ungas-ingus.
“Muhun nya, hayu urang parios” Lurah masihan paréntah.
Duk.. duk.. brak..!!!
Linggis jeung kampak muka hahalang, pikeun manggihan awak nu ngabugang. (AKW).
akwnulis 